Það er ekki gott að sofa á stýrisvaktinni

Það var fljótlega eftir síðustu aldamót sem ég fór að aðvara stjórnmálamenn um að tekjuöflunarkerfi þjóðarinnar bæri ekki þá þenslu sem væri að verða á þjónustugreinum þjóðarinnar, með tilheyrandi erlendu lántökum.

Það var hins vegar á árinu 1998 sem ég byrjaði að vara menn við hættulegum leikfléttum með krosseignatengsl í fyrirtækjum, þar sem greitt væri fyrir hlutabréf í fyrirtækjum með hutabréfum í öðrum fyrirtækjum, jafnvel í eigu sama aðila. Benti ég á raunhæf dæmi þar sem þrjú fyrirtæki juku eiginfjárstöðu sína um tvo milljarða með svona krosseignatengslum, án þess að til kæmi ein einasta króna í peningum.

Það hafa aldrei þótt farsælir stjórnendur sem hafa enga fyrirhyggju og sinna ekki hættumerkjum, en sofa rólegir þar til skipið er strandað. Það er einmitt það sem stjórnmálamenn hér á landi hafa gert, og eru einungis nýbyrjaðir þingmenn þar undanskildir. Þeir eru ýmist reynslulausir eða hafa tekið upp svefngengislhátt hinna reyndari þingmanna, í von um að þóknast forystunni.

Kannski látum við þetta verða okkur til varnaðar og höfum mikið meiri fyrirhyggju í stjórnun okkar á þjóðfélaginu í framtíðinni. Verði það svo, eru núverandi fórnir þjóðarinnar ekki til einskis.               

Ná þarf sátt um nýtt siglingakerfi

Athugasemdir

[Árni Gunnarsson, 3.10.2008 kl. 00:04]

Annar ríkistjórnarflokkanna hefur gleymt sér við að halda lærðar ræður um að leysa vanda þjóðarinnar með því að taka upp evru. Hann Einar gamli í Hvalnesi sagði að allur bölvaður vandræðagangurinn hefði byrjað þegar við hættum með rentuna og tókum upp vextina í staðinn. Ég veit ekki hvor ályktunin er spaklegri en sýnist þó að viðskiptaráðherrann hefði átt að gefa því meira ráðrúm að huga að sínum málaflokki í ríkisstjórninni.

Sjálfur held ég að þetta vesen stafi mestan partinn af bilun í Exel forritinu.

[Guðbjörn Jónsson, 3.10.2008 kl. 13:15]

Trúlega hittir þú naglann á höfuðuð Árni. Takk fyrir innlitið