Stundar Hafró niðurbrot þorskstofnsins?????????????

Aðferðarfræði Hafrannsóknarstofnunar við þróun vaxtar og viðgangs þorskstofna á Íslandsmiðum, hefur ævinlega verið í hrópandi andstöðu við allar aðrar kynbóta-, ræktunar-, eða þróunaraðferðir í heiminum; sama hvort horft er til jurta- eða dýraríkisins.

Öll viðleitni til vaxtar stofns og vaxandi nýliðunar hans, byggir á að rækta sem besta og flesta einstaklinga sem gefi af sér sem flest hraust afkvæmi. Þannig fjölgi sterkum einstaklingum í stofninum og nýliðun verði reglulegri og sterkari.

Löngu fyrir tíma Hafró, var það þekkt meðal sjómanna að stórir þorskar gáfu af sér margfallt fleiri seiði og ungfisk en fiskar sem voru á fyrstu árum kynþroska og sjálfir enn í líkamlegri uppbyggingu. Slíkir byrjendur kynþroskaskeiðs voru ekki taldir líklegir til mikilla afreka, á sviði uppbyggingar stofnsins. Veikburða líkami gæfi af sér veikburða hrogn, sem úr kæmu færri seiði og enn færri ungfiskar. Það þótti því ekki fiskimannslegt að drepa stórfiskinn síðla vetrar eða á vorin. Með slíku væri ekki verið að drepa einn fisk. Líklegra að margfalda mætti töluna með þúsund.

Þessa rökfræði er ég búinn að hlusta á frá sjómönnum í hart nær 60 ár. Hún er í fullu samræmi við alla hugmyndafræði ræktunar og uppbyggingar stofna, hvort sem litið er til plöntu eða dýraríkis. Hve lengi Hafró ætlar að ganga þvert gegn allri þróunarvinnu heimsbyggðarinnar, en segjast samt vera að byggja upp fiskistofna okkar, er ekki gott að segja. En lítil von er til þess að stjórnmálamenn hafi hugrekki eða burði til að stöðva vitlaus vinnubrögð Hafró.

Þeir skrá því frekar leiðinlegan kafla í Íslandssöguna um dómgreind græðgiskynslóðarinnar.

Verra að veiða stóra fiska?

Athugasemdir

[Jóhann Elíasson, 8.9.2008 kl. 11:21]

Jú um að gera að slátra fiskinum rétt áður en hann "hrygnir" því fólki finnst svo gott að fá hrogn og lifur og svo með tíð og tíma eigum við að hætta fiskveiðum því það verður að vera eitthvað eftir fyrir hvalinn til þess að éta, þá má ekki gleyma því að maðurinn er kjötæta það verður að koma honum fyrir kattarnef, því hann er kjötæta því kjötætur stuðla að hlýnun jarðar.  Þetta er boðskapurinn hjá "Náttúruverndar-Ayatollunum" og "Soyjalatteliðinu".  Hvað er eiginlega í gangi í heiminum.  Svo kemur Umhverfisráðherra í sjónvarpinu og "vælir" og óskapast yfir hugmyndum um virkjanir en það kemur ekki múkk frá henni vegna efnistöku ofan við Seljalandsfoss, vegna Bakkafjöruhafnar.  Vantar ekki einhverja samhæfingu í öll hennar störf?

[Guðbjörn Jónsson, 8.9.2008 kl. 16:03]

Líklega eru stjórnmálamen að drukna í eigin vitleysum.